पुणे : गरजू, आर्थिकदृष्ट्या दुर्बल रूग्णांना अत्यल्प दरात उच्चतम वैद्यकीय मदत करणाऱ्या नाना पालकर स्मृती समिती संस्थेस यंदाचा जनसेवा पुरस्कार जाहीर झाला आहे. जनसेवा सहकारी बँकेच्या वतीने दर वर्षी हा पुरस्कार देण्यात येतो.
‘बँकेच्या ४७ व्या वर्धापन दिनानिमित्त गुरूवारी,२४ ऑक्टोबर रोजी वानवडी येथील महात्मा ज्योतीराव फुले सांस्कृतिक सभागृहात सायंकाळी पाच वाजता हा पुरस्कार प्रदान सोहळा होणार आहे. या समारंभास प्रमुख पाहुणे म्हणून भारत विकास ग्रुपचे (बीव्हीजी) अध्यक्ष हणमंतराव गायकवाड उपस्थित राहणार आहेत,’ अशी माहिती जनसेवा सहकारी बँकेचे सरव्यवस्थापक किशोर घोलबा, मुख्य कार्यकारी अधिकारी विनायक जोशी, अध्यक्ष सीए प्रदीप जगताप, संचालक राजेंद्र वालेकर यांनी पत्रकार परिषदेत दिली.
‘२४ ऑक्टोबर १९९८ पासून या पुरस्काराची सुरुवात झाली. सुरुवातीला या पुरस्काराचे स्वरूप रोख २५ हजार रुपये होते. ३९व्या वर्धापन दिनापासून पुरस्काराची रक्कम ५१ हजार रुपये झाली, तर ४३व्या वर्धापन दिनापासून पुरस्काराची रक्कम एक लाख एक हजार रुपये करण्यात आली. १९९८ मध्ये पहिला पुरस्कार दादा किराड, प्रभाकर भट यांना देण्यात आला. आतापर्यंत १८ जनसेवा पुरस्कार प्रदान करण्यात आले आहेत. गेल्या वर्षी देशभरातील सेवाभावी संस्थांना विकासाच्या विविध विषयांवर मदत करणाऱ्या सेवावर्धिनी या संस्थेस जनसेवा पुरस्कार देण्यात आला,’ असे घोलबा यांनी सांगितले.